((فرياده گلون))
فرياده گلين نازلي نگاريم گئدير الدن همد م اولوب اغياريله ياريم گئدير الدن
رفتاري گوزل نطقي گوزل باخماسي گويچک آهو کيمي باخديقجا قراريم گئدير الدن
حسرتله قالار گوزلريم آخير دالئسيجا هجران يئلي اسديکجه بهاريم گئدير الدن
ناز ايله سه نازين چکرم ئول ديسه ئوللم يوخ چاره يولوم شعر و شعاريم گئدير الدن
آواره قالان من غم عشقينده يانان من آخير نه دييوم دار و نداريم گئدير الدن
زلفين توکوب اطرافه گيوب جامه ي زرين آماده اولوب گئتمگه ياريم گئدير الدن
شاعير:اوستاد هوشنگ جعفري
((شراب ناب))
ايچيديم بير شراب ناب عشقي گوزون تک کاسه ي پيمانه لرده
منه زيبا پرستليک عادت اولدو گوزوم قالدي رخ جانانه لرده
هوشوم باشدان چيخير قالمي قراريم قرا زلفون گورنده شانه لرده
اگر مجنون عشق اولسان منيم تک بيلردين وار نه حال ديوانه لرده
من اوندا مست عشقم گل دانيشدير سراغيم دوتگيلان ميخانه لرده
عزيز ليکده مني کاش بير گوريدين الان بير بايقوشام ويرانه لرده
خرابه گوشه سينده وار بير عالم که يوخ مجلس شاهانه لرده
منيم سن منبع الهاميم اولسان آديم دائيم قالار افسانه لرده
اوخوردي جعفري شعر آغلاشيردي نه بير ايشگين لري بيگانه لرده
شاعير:اوستاد هوشنگ جعفري
((گئجه لر))
دوت اليمدن بو همان الدي فراقينده سنون ياديمه سالماق همان باشه چالارديم گئجه لر
حسن رخساري روياده چکرديم قلمه قلبيمي قاب ائليوب قابه سالارديم گئجه لر
بونا خاطر کي آدين دوشميه اغيار الينه دوز کيمي آديوي يازديقجا يالارديم گئجه لر
بئله سيزلاردي اوره ک يادينا سالديقجا سني قوش کيمي يئرده دوشرديم چاپالارديم گئجه لر
بلکه سن ساغ ياشييب ساغ دولانيب ساغ گزه سن گوزه ليم هر قادان اولسايدي آلارديم گئجه لر
سن رقيبيمله گونوز سيره چيخاردين چمنه منده عشقينده سولارديم سارالارديم گئجه لر
گوزلرين ياديمه دوشدوکجه اسه ردي بدنيم سينه مي ديرناق آتارديم پارالارديم گئجه لر
تابلو اوستونده چکرديم سني مين زحمتيلن بير باخيب اوستونه تئز رنگي جالارديم گئجه لر
ايندي ده گئتمه ليسن گئت دئموروم من ده گليم قاللام اول حالدا کي اولده قالارديم گئجه لر
مکتب عشقيده مجنونئله من باهم ايديم غم ييغارديم سينمه غصه قالارديم گئجه لر
مجنون ئوز عشقيني ليلايه گوره بيلديردي من گونوز يازديقيم عشقي قارالارديم گئجه لر
شاعير:اوستاد هوشنگ جعفري
((گئتمه ترسا بالا سي))
اذن وئر توي گئجه سي من ده سنه دايه گليم ال قاتاندا سنه مشاطه تماشايه گليم
سن بو مهتاب گئجه سي سئيره چيخان بير سرواول اذن وئر من ده دالونجا سورونوب سايه گليم
منه ده باخدين او شهلا گوزوله من قارا گون جرئتيم اولمادي بير کلمه تمنايه گليم
من جهنم ده ده باش ياسديقا قويسام سنيله هئچ آييلمام کي دوروب جنت ماوايه گليم
ننه قارنيندادا سنله اکيز اولسيديم اگر ايسته مزديم دوغولوب بيز ده بو دنيايه گليم
سن ياتيب جنتي روياده گورنده گئجه لر من ده جنتده قوش اوللام کي او رويايه گليم
قيتليغ ايللر ياغشي تک قورويوب گوز ياشيميز کوي عشقونده گرک بيرده مصلايه گليم
سن ده صحرايه مارال لار کيمي بير چيخ نولي کي_ من ده بير صيده چيخانلار کيمي صحرايه گليم
آللاهوندان سن اگر قورخميوب اولسان ترسا قورخورام من ده دونوب دين مسيحايه گليم
شيخ صنعان کيمي دونقوز اوتاريب ايللرجه سني بير گورمک ايچون معبد ترسايه گليم
يوخ صنم!آنلاماديم,آنلاماديم,حاشا من بوراخيم مسجديمي سنله کليسايه گليم
گل چيخاق طور تجلايه سن اول جلوه ي طور من ده موسي کيمي او طوره تجلايه گليم
شيردير شهريارين شعري الينده شمشير کيم دئيه ر من بئله بير شيرله دعوايه گليم؟
شاعير:اوستاد شهريار
يالقيز غريب
عزيزيم دويماديم سندن
نه تئز مندن دويوب گئتدين؟
اجل گلجک بو غربتده
مني يالقيز قويوب گئتدين
يار قاصدي
سن ياريمين قاصدي سن اگلش سنه چاي دئميشم
خياليني گوندريب دي بسکه من آخ واي دئميشم
آخ! گئجه لر ياتماميشام من سنه لاي_لاي دئميشم
سن ياتالي من گوزومه اولدوز لاري ساي دئميشم
هر کس سنه اولدوز دئيه ئوزوم سنه آي دئميشم
سندن سونرا حياته من شيرين ديسه زاي دئميشم
هر گوزلدن بير گول آليب سن گوزه له پاي دئميشم
سنين گون تک باتماغيوي آي باتانا تاي دئميشم
ايندي يايا قيش دئييرم سابق قيشا ياي دئميشم
گاه طويووي ياده ساليب من ده لي ناي _ناي دئميشم
سونرا يئنه ياسه باتيب آغلاري هاي هاي دئميشم
اتک دولي دريا کيمي گوز ياشيما چاي دئميشم
عمره سورن من قره گون آخ دئميشم واي دئميشم
شاعير:اوستاد شهريار
آغيز يئمشي
بير گون آغيز قالي بوش بير گون دولي داد اولي
گون وار کي هئچ زاد اولماز گون وار کي هر زاد اولي
بختين دورا باخارسان يادلار قوهوم قارداش دي
آمما بختين ياتاندا قوهوم قارداش ياد اولي
چاليش آدين گلنده رحمت اوخونسون سنه
دنيا دا سندن قالان آخير دا بير آد اولي
گوردون ايشين اگيلدي دورما اکيل گوزد ن ايت
دوستون گوره ر داريخار دوشمن گوره ر شاد اولي
شاعير:اوستاد شهريار
تانرینین آدی و یادینان